молитесь и всё наладиться . Приими, о Всеблагословенная и Всемощная Госпоже Владычице Богородице Диво, ся молитвы. со слезами Тебе приносимыя от нас, недостойных раб Твоих, ко Твоему цельбоносному образу пение возсылающих со умилением, яко Тебе Самой, зде сущей и внемлющей молению нашему. По коемуждо бо прошению исполнение твориши, скорби облегчаеши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от обид избавляеши, прокаженныя очищаеши и малыя дети милуеши, еще же, Госпоже Владычице Богородице, и от уз и темниц свобождаеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай молитися о нас, недостойных рабах Твоих, славящих Тя и почитающих Тя, и поклоняющихся со умилением Пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков. Аминь.
Молитва об исцелении от болезни.
Владыко Вседержителю, Врачу душ и телес наших,
смиряяй и возносяяй, наказуяй и паки исцеляяй!
Раба Твоего (имя) немощствующа посети милостию Твоею,
простри мышцу Твою, исполнену исцеления и врачбы,
и исцели его, возстави от одра и немощи.
Запрети духу немощи,
остави от него всяку язву, всяку болезнь, всяку огневицу и трясавицу,
и еже есть в нем согрешение или беззаконие,
ослаби, остави, прости Твоего ради человеколюбия.
Ей, Господи, пощади создание Твое во Христе Иисусе, Господе нашем,
с Нимже благословен еси,
и со пресвятым, и Благим, и Животворящим Твоим Духом,
ныне и присно и во веки веков.
Аминь.
